📰 नाशिक–मुंबई लॉंग मार्चमधील आंदोलकांनी महामार्गावर साजरा केला प्रजासत्ताक दिन; २५ हजार शेतकरी बांधवांचा उत्स्फूर्त सहभाग

नाशिकहून मुंबईकडे निघालेल्या अखिल भारतीय किसान सभेच्या लॉंग मार्चमधील आंदोलकांनी यंदाचा २६ जानेवारी २०२६ रोजीचा प्रजासत्ताक दिन नाशिक–मुंबई राष्ट्रीय महामार्गावरच आगळ्या-वेगळ्या पद्धतीने साजरा केला.

इगतपुरी तालुक्यातील आंबेबहुले येथे पहाटेच्या कडाक्याच्या थंडीत जवळपास २५ हजार (२५,०००) आंदोलकांनी देशाच्या राष्ट्रीय सणात उत्स्फूर्त सहभाग नोंदवला. पक्षशिस्त पाळत, शिस्तबद्ध आणि उत्साही वातावरणात तिरंगी ध्वजाला मानवंदना देण्यात आली.

महामार्गावर अभिमानाने फडकला तिरंगा

मोर्चाच्या अग्रगाडीवर राष्ट्रध्वज सन्मानपूर्वक फडकवण्यात आला. यावेळी मार्क्सवादी कम्युनिस्ट पक्षाचे ज्येष्ठ नेते डॉ. अशोक ढवळे,
लॉंग मार्चचे नेतृत्व करणारे मा. आमदार कॉ. जे. पी. गावीत,
डॉ. अजित नवले, कॉ. उमेश देशमुख, कॉ. सुनील मालुसरे, कॉ. इंद्रजित गावीत, कॉ. सावळीराम पवार, कॉ. भिका राठोड, कॉ. उत्तम कडू, कॉ. जनार्दन भोये, कॉ. रामभाऊ गघले, कॉ. अशोक धून, कॉ. नितीन गावीत, कॉ. केदू वाघमारे, कॉ. पुंडलिक चौधारी आदी नेत्यांनी तिरंग्याला पुष्प अर्पण करून सलामी दिली.

राष्ट्रगीताने दुमदुमला महामार्ग

या वेळी उपस्थित २५ हजार आंदोलकांनी संगीताच्या तालावर राष्ट्रगीत व ध्वजगीत म्हटले.
महिला, पुरुष, युवक, वृद्ध अशा सर्व वयोगटातील आंदोलक महामार्गावर आपापल्या जागी रांगेत उभे राहत प्रजासत्ताक दिनाला मानवंदना देत होते.

भारताला स्वातंत्र्य मिळवून देणाऱ्या स्वातंत्र्यसैनिकांच्या, हुतात्म्यांच्या आणि भारतीय घटनेचे शिल्पकार भारतरत्न डॉ. बाबासाहेब आंबेडकर यांच्या नावाने जोरदार घोषणा देण्यात आल्या.

हजारो तालुक्यांतील आंदोलकांचा सहभाग

या भव्य सोहळ्यात नाशिक जिल्ह्यातील
सुरगाणा, कळवण, पेठ, दिंडोरी, चांदवड, सटाणा, नाशिक व इतर तालुक्यांतील हजारो शेतकरी, शेतमजूर व आदिवासी बांधव सहभागी झाले होते.

गोरगरीब, आदिवासी–बिगर आदिवासी, शेतकरी, कामगार, शोषित वर्गातील नागरिकांनी आपल्या न्यायहक्कांच्या मागणीसाठी मुंबईकडे वाटचाल करत असतानाच महामार्गावर प्रजासत्ताक दिन साजरा केल्याने हा प्रसंग सर्वांच्या मनाला स्पर्श करून जाणारा ठरला.

संविधानाच्या मूल्यांचा जागर

यावेळी प्रास्ताविक करताना कॉ. रामचंद्र गांगुर्डे यांनी भारतीय संविधानाचे महत्त्व स्पष्ट केले.
भारतीय घटनेचे शिल्पकार डॉ. बाबासाहेब आंबेडकर यांचे योगदान, संविधानातील अधिकार, हक्क, स्वातंत्र्य, न्याय, समता, बंधुता, लोकशाही, समाजवाद व धर्मनिरपेक्षतेची मूल्ये यांची माहिती आंदोलकांना देण्यात आली.

“डॉ. बाबासाहेबांनी दिलेल्या घटनेच्या आधारावरच आम्ही आमच्या न्यायहक्कांसाठी शासन दरबारी चाललो आहोत,” असे त्यांनी ठामपणे सांगितले.

घोषणा देत मुंबईकडे कूच

प्रजासत्ताक दिनाच्या घोषणा देत संपूर्ण परिसर दणाणून गेला. राष्ट्रध्वजाला सलामी दिल्यानंतर सर्व आंदोलकांनी पुन्हा एकदा मुंबईच्या दिशेने कूच केली.

न्यायहक्कासाठी सुरू असलेल्या या लॉंग मार्चमध्ये देशभक्ती, संविधाननिष्ठा आणि संघर्षाची भावना एकाच वेळी अनुभवायला मिळाली.